Naran organizasaun mak Forum ONG Timor-Leste ka The Timor Leste NGO Forum ne’ebe habadak FONGTIL.

Sede FONGTIL iha Caicoli-Rumbia,Rua do Merkadu Municipal, Dili-Timor-Leste. Sede FONGTIL mos sei iha filial seluk iha rejiaun ka Munisipiu sira ne’ebe bele konsidera bainhira presiza hosi tempu ba tempu.

FONGTIL harii iha dia 02 Juñu 1998, husi ONG sanulu resin haat (14) ne’ebe temi ona iha Prefasiu.

Emblema ofisiál FONGTIL nian mak imajen uma tradisionál iha mapa Timor-Leste ne’ebe ho kór matak nia leten, hatu’ur iha modelu sirklu nia laran ho liafuan hakerek ho kór mean “Forum ONG Timor-Leste”.

Emblema nia signífikasaun mak hanesan tuir mai ne’e: Uma tradisionál reprezenta identidade no unidade organizasaun naun-govermentál sira iha Timor-Leste laran tomak;

Mapa Timor-Leste reprezenta teritóriu ita nia nasaun, no kór matak simboliza ita nia rekursus naturais no rai bokur ne’ebe lori esperansa ba futuru povu Timor-Leste;

Naran FONGTIL ne’ebe haleu uma tradisionál no mapa Timor-Leste reprezenta unidade sidadaun tomak no importansia sosiedade sivíl ida ne’ebe forte no unidu. Naran FONGTIL hakerek iha kór mean simboliza forsa no barani povu Timorense nia luta hodi kria sosiedade ne’ebe diak no justu.

FONGTIL hanesan organizasaun sumbrinha naun-governamentál nasionál ida ho natureza nudar Asosiasaun ho nia personalidade juridika bazeia ba Decreto Lei no.5/2005,3 de Agustu konaba Orgaun Korporativo sira nebe la hetan lukru, bazeia ba membru sira ne’ebe kompostu hosi organizasaun naun-governmentál sira (ONGs) Lokál, Nasionál, no Internasionál iha Timor-Leste laran tomak, no fiár iha vizaun, misaun, prinsípius no objetivu FONGTIL nian.

VIZAUN

Vizaun FONGTIL nian mak:

Timor Leste nasaun ida ne’ebe dezenvolvidu, ho prosperu no livre hosi eksplorasaun, diskriminasaun no korupsan, no kaer-metin Prinsipius honestidade, justisa no demokrasia, iha ne’ebe sidadaun hotu hetan suporta hosi sosiedade sivil ida ne’ebe mak forte no independente.

MISAUN

Misaun FONGTIL nian mak atu serbisu hamutuk ho, no mos atu suporta, organizasaun membru sira hodi:

Promove no hala’o advokasia ba setór hotu atu hetan prosperiedade no interese sidadaun Timor-Leste tomak;

Buka hodi asegura povu Timor-Leste ne’ebe mak livre hosi kualkér formas injustisa, inklui mos ki’ak, eksplorasaun no diskriminasaun, no iha oportunidade atu partísipa ho nakloke no livre iha prosesu halo desizaun polítika no demokrátiku;

Suporta no hametin setór ONG atu sai lian ne’ebe efektivu ba sidadaun Timor-Leste tomak, liu-liu povu ne’ebe mak vulnerável liu iha ita nia komunidade.

MANDATU

1. FONGTIL nudar organizasaun bazeia ba organizasaun membru sira. Se la’os hanesan ne’e bainhira Estatuta hateten seluk, desizaun relasiona polítikas no programas FONGTIL nian, sempre posivel no pratikável, realiza hafoin konsultasaun ho organizasaun membru sira.

2. FONGTIL hala’o nia aktividades atu atinji objetivu, ka atu suporta organizasaun membru bazeia ba mandatu ne’ebe deside husi Membru Organizasaun iha Enkontru jeral membru nian.

3. Mandatu FONGTIL sei la ses husi Deziminasaun Informasaun,Kordenasaun, Hakbiit Kapasidade Membru no Advokasia.

4. Membru FONGTIL bele propoin mandatu sira seluk liu husi Enkontru jeral membru ou Extra-Ordinariu ba situasaun spesifiku ruma.

Forum Organizasaun Naun Govermentál Timor-Leste (FONGTIL)

Informasaun

Fatin